Bejaarde deur Tuinwerker in Huis Gemartel
Engela Nel (86)
NYLSTROOM – ’n Bejaarde
vrou van Nylstroom het gebid vir haar tuinwerker wat haar glo ure lank
in haar huis gemartel het omdat hy geld gesoek het.
Engela Nel (86) van die Zebra
Park-veiligheidsoord se gesig was meer as ’n week ná die aanval op
Woensdag 19 Maart 2014 steeds pimpel en pers van die aanranding.
Die Pos berig Nel se tuinwerker van die
afgelope vyf jaar het haar aangeval omdat hy R3000 gesoek het. Kol.
Ronel Otto, polisiewoordvoerder, sê daar word dringend na Thomas
Madimetsha Kemp (39) gesoek. ’n Foto van Kemp is eers eergister aan die
media verskaf. Die polisie het nie die media van die aanval ingelig toe
dit gebeur het nie.
Nadat Kemp om ongeveer 16:30 klaar
gewerk het, het hy blykbaar saam met Nel kombuis toe gestap, nes altyd,
waar sy hom vir die dag se werk moes betaal. Hy het ’n register gehad
waarin hy gewoonlik ontvangs geteken het vir sy geld.
Engela Nel sê dat hy op dié dag kastig
vir haar ’n lekkende kraan in die badkamer in haar slaapkamer wou wys,
maar dat sy nie saam met hom soontoe gestap het om te gaan kyk nie. Sy
het net vir hom gesê dat daar nie tyd was daarvoor nie. Sy was van plan
om hom by die huis te gaan aflaai, aangesien dit gelyk het asof dit
binnekort sou reën.
Kemp het haar toe glo vir meer geld
gevra, maar Nel het vir hom gesê dat sy nie soveel geld het nie. Die
volgende oomblik, vertel sy, het dit vir haar gevoel asof sy deel is van
’n nare droom.
Toe sy omdraai om haar motorsleutel op
die kombuistoonbank te vat, het hy haar glo van agter om die nek gegryp
en begin wurg. Sy is hard op die kop geslaan en het vir ’n ruk haar
bewussyn verloor.
Toe sy ’n bietjie later in haar
slaapkamer op die mat bygekom het, was Kemp besig om haar hande en voete
vas te bind en aan die bed se pote vas te maak. Hy het ook tou om haar
nek en oor haar mond vasgebind. Nel sê dat die toue só styf vasgemaak
was, dat die gevoel in haar hande en voete doodgegaan het. Daar was ook
baie bloed.
Sy sê dat sy vir hom gevra het hoekom hy
dit doen. Hy het geantwoord dat hy R3 000 nodig het, blykbaar vir ‘n
sangoma-kursus wat hy wou aflê of reeds afgelê het. Die hele tyd wat sy
met hom probeer praat en by hom gepleit het om haar los te maak, het hy
glo aangehou om te sê dat hy daardie bedrag geld nodig het. Sy het vir
hom gesê dat sy nie soveel geld in die bank het nie, maar hy het
blykbaar aangehou om vir haar te sê dat sy jok en dat hy haar nie
vertrou nie.
GESOEK: Thomas Madimetsha Kemp (39) – Klik op foto vir vergroting
Nel het later vir Kemp die kluis in haar
studeerkamer oopgemaak, waarin daar ook niks van waarde was nie. Hy het
haar toe in die studeerkamer toegesluit terwyl hy deur die huis gestap
het en al die sleutels wat in die huis was, bymekaar gemaak het. Nel het
die studeerkamer se duplikaatsleutel, wat toevallig ook in die kluis
was, uitgehaal en die studeerkamer se deur versigtig oopgesluit. Omdat
hy haar debietkaart gevat het, het sy gedink dat hy dalk gery het om te
gaan kyk hoeveel geld hy uit haar rekening kon trek.
Toe sy by die studeerkamer uitstap, het
hy haar egter weer van agter gegryp en gevra of sy probeer wegkom. Die
toue, wat die dun vel oor haar arms en gewrigte teen dié tyd deurgeskaaf
het, is nóg stywer getrek.
Teen ongeveer middernag is Kemp glo met
Nel se bankkaart, selfoon, TV en motorsleutels weg. Die landlyn is
blykbaar al vroeër ontkoppel en uit die studeerkamer geneem. Nel het
haar handvuurwapen, wat in die studeerkamer versteek was, met haar
geswelde en bebloede hande probeer laai en dit ná ’n gesukkel reggekry
om twee skote af te vuur om die bure se aandag te trek.
Sy het ook een van die venstertjies in
die studeerkamer se glasdeur met ’n ornament gebreek. “Ek het besluit as
hy weer terugkom, skiet ek hom dood voordat hy mý doodmaak,” het Nel
gesê.
In die studeerkamer het sy ook ou
Telkom-telefone onder in ’n boekrak gekry en gelukkig het een van hulle
gewerk. Sy het van die bure gebel en laat weet wat gebeur het. Terwyl sy
besig was om oor die telefoon te praat, het sy haar aanvaller skielik
wéér deur die glasvensters van die studeerkamer by die agterdeur sien
inkom. Sy het hard vir haar buurman oor die foon gesê: “Bel die polisie,
ek is deur Thomas (almal daar ken hom) aangeval.” Kemp het volgens haar
net daar in sy spore omgedraai en verdwyn.
Een van haar bure, Theuns Minnaar, het
’n spaarsleutel vir Nel se voordeur gehad en kon die huis oopsluit. Die
polisie, wat glo baie flink gereageer het op die oproep, moes egter die
studeerkamer se deur oopskop om Nel te bevry, aangesien Kemp dié, sowel
as alle ander sleutels in die huis met hom saamgeneem het.
Nel is eers na dr. Mich Veldman geneem
om haar wonde te verbind, voordat ds. Fanie Hoffman (voorheen van die
Hervormde Kerk op Nylstroom) haar teen ongeveer 01:30 die oggend na die
Orania-versorgingseenheid in die Noord-Kaap geneem het, waar sy tot
Sondag, 23 Maart, behandel is. Haar dogter, Estelle Pretorius, het vir
’n paar dae kom kuier sodat sy ’n ogie oor haar ma kan hou. Sy sê dat
dit die vreeslikste gevoel is om in die middel van die nag wakker gebel
te word en te hoor dat jou ma aangeval is.
Nel is die tweede bejaarde inwoner in ’n
kort tydperk wat op Nylstroom aangeval is. Piet Venter is verlede jaar
ook pimpel en pers geslaan nadat hy in sy huis by die Amarula-kompleks
deur ’n mede-inwoner se seun oorrompel en aangerand is vir geld.
“Ek kan nou nog nie glo dat Thomas tot
so iets in staat was nie. Ek het op ’n stadium, terwyl hy my aangehou
het, vir hom gesê om my hand te vat sodat ek vir hom ook kan bid omdat
hy met ’n verkeerde ding besig was,” vertel sy. Haar advies aan die
gemeenskap: “Moet niémand vertrou nie.”
Ao. James Findlay, woordvoerder vir die
polisie op Nylstroom, het gesê dat Nel se motor en selfoon later die nag
in Kroepstraat, naby die polisiestasie, gevind is. Kemp is nog nie
opgespoor nie, maar ’n saak van huisroof en diefstal van ’n voertuig is
geopen. Dit word deur ao. Koos van der Berg en sy span ondersoek. ’n
Beloning word aangebied vir positiewe inligting wat mag help met die
ondersoek.
Pretorius het gesê haar ma is ’n sterk
vrou. Sy woon nou by Pretorius in Pretoria omdat die verdagte nog nie
aangekeer is nie. Enigiemand met inligting kan ao. Koos van der Berg bel
by 072-534-5334.
No comments:
Post a Comment